اقوام متحدہ کی رپورٹس: 1.5 ڈگری سے اوپر گرمی گلیشیئرز کو مستقل نقصان پہنچائے گی

اقوام متحدہ کی دو رپورٹس میں، جو پیر کو جاری ہوئیں، خبردار کیا گیا ہے کہ عالمی درجہ حرارت میں 1.5 ڈگری سے زیادہ اضافہ گلیشیئرز، سمندری برف اور زمین کے منجمد خطوں پر ناقابل واپسی اثرات مرتب کرے گا۔ رپورٹس میں فوری اقدامات کا مطالبہ کیا گیا ہے۔

سنہ 2015 کے پیرس معاہدے میں دنیا نے گرمی کو 2 ڈگری سے خاصا کم رکھنے اور اسے 1.5 ڈگری تک محدود کرنے کی کوشش کا عہد کیا تھا۔ یورپی نیٹ ورک کوپرنیکس کے مطابق گرمی صنعتی دور سے پہلے کی سطح سے 1.37 ڈگری اوپر پہنچ چکی ہے اور 1.5 ڈگری کی حد 2030 کے آس پاس عبور ہو سکتی ہے۔

ایک رپورٹ 'اوور شوٹ اینڈ دی کرایوسفیئر' 80 سائنس دانوں کے ساتھ مل کر لکھی گئی۔ اس کے مطابق 1.5 ڈگری سے تجاوز کریا سفیئر پر بڑے اور کئی صورتوں میں ناقابل واپسی اثرات ڈالے گا۔ گلیشیئرز اور سمندری برف کے پگھلنے، پرما فراسٹ کے گھلنے اور سمندری سطح میں تیز اضافے کے وسیع نتائج ہوں گے، جن میں سیلاب اور پانی کی قلت شامل ہیں۔ سوئٹزرلینڈ میں گلیشیئرز کی کمیت پہلے ہی 20 فیصد کم ہو چکی ہے۔

اقوام متحدہ کے مطابق موجودہ درجہ حرارت آرکٹک، انٹارکٹکا، پہاڑی گلیشیئرز اور قطبی سمندروں کے لیے پہلے ہی غیر محفوظ ہے۔ اس کا کہنا ہے کہ آنے والی صدیوں میں زمین کی برف کے لیے محفوظ درجہ حرارت اب 1 ڈگری یا اس سے کم سمجھا جاتا ہے۔

رپورٹ کے مرکزی مصنف اور برفانی ماہر جیمز کرکہم نے کہا: "1.5 ڈگری سے تجاوز کا کوئی اچھا نتیجہ نہیں ہو سکتا۔" (انگریزی سے ترجمہ) انہوں نے یہ بھی کہا: "قطبی اور پہاڑی علاقوں میں برف کے نقصان کے عالمی اثرات کو محدود رکھنے کے لیے حد سے تجاوز کو کم از کم رکھنا ہوگا۔" (انگریزی سے ترجمہ)

سائنس دانوں نے بعض نازک حدیں عبور ہونے کے خطرے سے خبردار کیا اور کہا کہ درجہ حرارت 1.5 ڈگری سے نیچے آ بھی جائے تو بحالی بہت سست ہوگی۔ نیو ساؤتھ ویلز یونیورسٹی کے میتھیو انگلینڈ کے مطابق بحالی میں دہائیاں سے صدیاں لگ سکتی ہیں۔ گرمی 1.5 یا 1 ڈگری سے نیچے لانے سے کچھ گلیشیئرز جزوی طور پر بحال اور سمندری برف کو فائدہ ہو سکتا ہے۔

دوسری رپورٹ 'اسٹیٹ آف دی کرایوسفیئر 2026: دی کاسٹ آف اوور شوٹ' کے مطابق اگلی صدی میں 2.8 ڈگری سے تجاوز کے سنگین نتائج ہوں گے۔ 2150 تک سمندری سطح سالانہ 5 سینٹی میٹر تک بڑھ سکتی ہے، جبکہ اس وقت یہ شرح 0.45 سینٹی میٹر سالانہ ہے۔ پرما فراسٹ کے گھلنے سے ہر سال اتنی کاربن ڈائی آکسائیڈ خارج ہو سکتی ہے جتنی امریکا کرتا ہے۔

رپورٹ کے بدترین مگر خاصے ممکن منظرنامے میں ممالک اپنے موسمیاتی وعدے پورے بھی کریں تو 2100 تک دنیا 2.6 ڈگری گرمی کی طرف بڑھ رہی ہے۔ رپورٹ کے مطابق سیاسی عزم، بشمول فوسل ایندھن سے منتقلی تیز کر کے صدی کے وسط تک نیٹ زیرو حاصل کرنے سے 2100 تک 1.5 ڈگری یا اس سے نیچے واپسی اب بھی ممکن ہے۔

نیپال کی گلیشیئر محقق گنجن سلوال نے کہا کہ اگست میں پہاڑ اور گلیشیئر کے گرنے سے 1,400 سے زیادہ لوگ ہلاک اور 5,000 سے زیادہ لاپتا ہوئے۔ انہوں نے اسے آئندہ نقصان کی صرف ایک جھلک قرار دیا اور کہا کہ حد سے تجاوز "نقصان کی وسعت کو مستقل کر دے گا۔" (انگریزی سے ترجمہ)