وزارت صحت نے اسلام آباد کیلئے کیئر 1166 شکایتی نظام شروع کردیا

وفاقی وزیر برائے قومی صحت سید مصطفیٰ کمال نے بدھ کو اسلام آباد میں فیڈرل ڈائریکٹوریٹ آف امیونائزیشن میں کیئر 1166 ہیلتھ کمپلینٹ مینجمنٹ سسٹم کا افتتاح کیا۔ اسلام آباد سے اے پی پی کے مطابق یہ ایک مرکزی ڈیجیٹل پلیٹ فارم ہے، جس کا مقصد عوام کیلئے شکایات درج کرانا آسان بنانا اور پورے شعبہ صحت میں جواب دہی کو مضبوط کرنا ہے۔

وزارت صحت نے عوامی شکایات کے ازالے کیلئے ہیلپ لائن نمبر 1166 متعارف کرائی ہے۔ اسلام آباد کے رہائشی وزارت قومی صحت اور اس کے ماتحت محکموں اور اداروں سے متعلق شکایات اس ہیلپ لائن پر براہ راست کال کرکے درج کراسکتے ہیں۔

ایکسپریس نیوز کے مطابق شہریوں کو شکایت درج کرانے کیلئے مختلف سرکاری دفاتر کے چکر نہیں لگانا پڑیں گے۔ اس نظام کے تحت شکایات خودکار طور پر متعلقہ افسر یا محکمہ صحت کو بھیج دی جائیں گی۔

ایکسپریس نیوز کے مطابق ہر شکایت کی پیش رفت، یعنی کی گئی کارروائی سے لے کر حتمی حل تک، ہر مرحلے پر مانیٹر کی جائے گی۔ ہر شکایت ایک ذمہ دار افسر کو منتقل ہوگی اور اس کی پیش رفت کا ریکارڈ رکھا جائے گا۔ ہر شکایت کیلئے متعلقہ اسپتال میں ایک ذمہ دار افسر بھی مقرر کیا جائے گا۔

اس مقصد کیلئے ایک مرکزی ڈیش بورڈ قائم کیا گیا ہے۔ اس کے ذریعے وفاقی وزیر صحت اپنے دفتر سے شکایات اور ان کی پیش رفت کا جائزہ لے سکیں گے۔ ایکسپریس نیوز کے مطابق یہ ڈیش بورڈ مختلف علاقوں میں بیماریوں اور صحت کے مسائل کی نشاندہی میں بھی مدد دے گا۔

ایکسپریس نیوز کے مطابق نئے نظام سے اسپتالوں کی شکایات کا ایک مرکزی اور قابل سراغ ریکارڈ تیار ہوگا۔ اس سے وزارت صحت کو شہریوں کی شکایات اور اسپتالوں میں خدمات کی فراہمی کی براہ راست نگرانی میں مدد ملے گی، تاکہ عوام کی جانب سے اٹھائے گئے مسائل کو پہلی کال سے حل تک دیکھا جاسکے۔