پنجاب کے کاشتکاروں کیلئے 10 اعلانات، ایک کروڑ تک قرض پر صفر مارک اپ

وزیراعلیٰ پنجاب مریم نواز شریف نے صوبے بھر کے چھوٹے، درمیانے اور بڑے کاشتکاروں کے نمائندوں سے ملاقات میں 10 بڑے اعلانات کیے۔ ان میں صوبے کا پہلا اپنا کسان بینک، سستے قرضے، کسان کارڈ کی بڑھی ہوئی حد اور زیتون کی کاشت کا خصوصی پیکج شامل ہیں۔

قرضوں کے بارے میں انہوں نے بتایا کہ ایک کروڑ روپے تک قرض پر صفر مارک اپ ہوگا، تین کروڑ روپے تک پر 2 فیصد اور پانچ کروڑ روپے تک پر 5 فیصد انٹرسٹ لیا جائے گا۔ ان کے مطابق کاشتکاروں کو 17 ارب روپے کے سبسڈی لون بھی دیے جا رہے ہیں۔

کسان کارڈ پر فی ایکڑ قرض کی حد 3500 روپے بڑھا کر 30 ہزار سے 33 ہزار 500 روپے کر دی گئی۔ انہوں نے کہا کہ کھاد کی قیمتوں میں اضافے کے پیش نظر یہ اضافہ کیا گیا۔ ان کے مطابق 10 لاکھ سے زائد چھوٹے کاشتکار کسان کارڈ سے فائدہ اٹھا رہے ہیں، ڈیجیٹل نظام سے قرضوں میں میرٹ یقینی ہوتا ہے اور مڈل مین کا کردار کم ہوا ہے۔ ٹھیکے اور لیز پر کاشت کرنے والوں کو بھی شامل کرنے کے اقدامات جاری ہیں۔

وزیراعلیٰ نے کہا کہ وزیراعظم کی سربراہی میں ہونے والے فیصلے کے مطابق گندم 4500 روپے فی من امدادی نرخ پر خریدی جائے گی۔ خریداری کا منصوبہ جلد متعارف کرایا جائے گا اور ڈیجیٹل پراسیسنگ کیلئے آن لائن پورٹل بھی لایا جائے گا۔

مشینی کاشت کے حوالے سے انہوں نے بتایا کہ گرین ٹریکٹر اسکیم کے تحت اب تک 25 ہزار ٹریکٹر سبسڈی پر دیے جا چکے ہیں اور مجموعی طور پر 50 ہزار فراہم کرنے کا منصوبہ ہے۔ ہائی ٹیک میکانائزیشن کیلئے 70 ارب روپے رکھے جا رہے ہیں، جبکہ 1500 ایگریکلچر انٹرنز ماہانہ 70 ہزار روپے پر کام کر رہے ہیں۔ موبائل مٹی اور پانی کی جانچ کی لیبارٹریاں بھی متعارف کرائی جائیں گی۔

سرگودھا، بھکر، خانیوال اور اوکاڑہ میں ایگرو پراسیسنگ پارک بنائے جا رہے ہیں۔ پانی چوری کیخلاف مہم جاری رہے گی، نہروں کی بھل صفائی ہوگی، کھالے پختہ کیے جائیں گے اور پوٹھوہار میں 400 منی ڈیم بنائے جائیں گے۔

مریم نواز نے کہا کہ پنجاب ملک کی 70 فیصد غذائی ضروریات پوری کرتا ہے۔ لائیو اسٹاک میں گزشتہ سال چار لاکھ جانور فربہ کیے گئے اور اس سال چھ لاکھ کا ہدف ہے۔ انہوں نے سموگ کے خاتمے کیلئے فصلوں کی باقیات نہ جلانے کی اپیل کی اور تجاویز پر مرحلہ وار عملدرآمد کی یقین دہانی کرائی۔ کاشتکاروں نے کسان کارڈ اور گندم کے امدادی نرخ کو سراہا۔