پیٹرولیم ریلیف کیلیے حکومت اور جماعت اسلامی کی مشترکہ کمیٹی قائم

وزیراعظم شہباز شریف سے امیر جماعت اسلامی حافظ نعیم الرحمان کی قیادت میں وفد نے ملاقات کی۔ وزیراعظم آفس کے اعلامیے کے مطابق حکومت اور جماعت اسلامی کے تین، تین ارکان پر مشتمل کمیٹی بنانے پر اتفاق ہوا۔

اعلامیے میں کہا گیا کہ کمیٹی حتمی سفارشات پیش کرے گی۔ وہ پیٹرول پر جاری ریلیف اسکیم کا دائرہ بڑھانے اور زیادہ سے زیادہ مستحق افراد کو اس سے فائدہ پہنچانے کی تجاویز دے گی۔ کمیٹی بجٹ کے اندر رہتے ہوئے پیٹرولیم لیوی میں مرحلہ وار کمی کی قابل عمل تجاویز بھی تیار کرے گی۔

وزیراعظم نے کہا کہ پیٹرولیم مصنوعات کی قیمتیں بڑھنے سے عوام پر پڑنے والے بوجھ کا پوری طرح احساس ہے۔ ان کے مطابق موجودہ بحران کا تعلق حکومتی پالیسیوں سے نہیں بلکہ علاقائی اور بین الاقوامی حالات میں تیل کی قیمتیں بڑھنے سے ہے۔ انھوں نے کہا کہ حکومت علاقائی بحران کے حل کیلیے سفارتی کوششیں کر رہی ہے اور مالی استطاعت کے مطابق ریلیف دیتی رہے گی۔

اعلامیے کے مطابق وزیراعظم نے وفد کو کم آمدن طبقے کیلیے ریلیف کی تفصیل بتائی اور کہا کہ اب تک ایک کروڑ 27 لاکھ افراد اسکیم میں رجسٹر ہو چکے ہیں۔

اسلام آباد میں وفاقی وزیر احسن اقبال اور مشیر وزیراعظم رانا ثناء اللہ نے مشترکہ پریس کانفرنس کی۔ احسن اقبال نے کہا کہ دنیا ہنگامی صورتحال کا سامنا کر رہی ہے اور آبنائے ہرمز کی بندش سے تیل کی رسد متاثر ہو رہی ہے، جس سے تمام ملکوں میں قیمتیں بڑھی ہیں۔ ان کے مطابق جماعت اسلامی کے وفد نے تجاویز دی ہیں، کمیٹی ٹھوس تجاویز کو حتمی شکل دے گی اور فیول ریلیف اسکیم کا دائرہ بڑھانے پر بھی غور ہوگا۔ انھوں نے یہ بھی کہا کہ کوئی نہیں کہہ سکتا آئندہ 2 سے 3 ماہ میں تیل کی قیمت کس رفتار سے بڑھے گی۔

احسن اقبال نے کہا کہ ہنگامے اور مظاہروں سے معیشت کے استحکام کا مقصد حاصل نہیں ہو سکتا۔ رانا ثناء اللہ نے کہا کہ حکومت عام آدمی کو مزید ریلیف دینا چاہتی ہے اور جماعت اسلامی کی سوچ بھی یہی ہے۔

حافظ نعیم نے کہا کہ حکومت نے پیٹرولیم لیوی پر 7 سے 10 دن مزید مانگے ہیں۔ ان کے مطابق مارچ کی تیاری جاری رہے گی، ملک بھر میں موبلائزیشن شروع ہو گی اور لیوی ختم نہ ہوئی تو نومبر کے وسط میں اسلام آباد کی طرف مارچ ہوگا۔ انھوں نے کہا کہ حکومت سے مزید بات چیت ہوگی۔