سپریم کورٹ نے ضمانت منسوخی کے لیے آٹھ اصول طے کر دیے

سپریم کورٹ نے ملزم کی ضمانت منسوخ کرنے کے لیے آٹھ اصول طے کر دیے ہیں۔ عدالت نے یہ اصول لاڑکانہ کے ایک مقدمے میں علی اصغر کھوکھر کی ضمانت کا سندھ ہائیکورٹ کا فیصلہ برقرار رکھتے ہوئے بیان کیے۔ فیصلہ جسٹس محمد علی مظہر نے تحریر کیا۔

رپورٹس کے مطابق ضمانت کا حکم بادی النظر میں غیر قانونی یا ناانصافی پر مبنی ہو، یا ملزم ضمانت کی رعایت کا ناجائز استعمال کرے تو ضمانت منسوخ کی جا سکتی ہے۔ اسی طرح گواہوں پر دباؤ ڈالنے، شواہد میں ردوبدل کرنے یا شواہد پیش کرنے میں رکاوٹ ڈالنے پر بھی ضمانت منسوخ ہو سکتی ہے۔

دیگر بنیادوں میں عدالت کے دائرہ اختیار سے باہر فرار ہونے کا خدشہ، منصفانہ تفتیش میں مداخلت، اور ضمانت کے دوران ویسا ہی جرم دوبارہ کرنا شامل ہیں۔ تفتیش کے دوران نئے حقائق یا شواہد سامنے آئیں جن سے ملزم کا جرم میں ملوث ہونا ظاہر ہو تو بھی ضمانت منسوخ کی جا سکتی ہے۔

مقدمہ نور حسین کی ہلاکت سے متعلق ہے جو 3 مارچ 2024 کو پیش آئی۔ رحمت پور تھانہ لاڑکانہ میں درج ایف آئی آر کے مطابق دکانوں کو ڈسپوزل فیز سے کھینچی گئی خصوصی لائن سے بجلی فراہم کی جا رہی تھی کہ تار ٹوٹ گیا۔

سیشن کورٹ لاڑکانہ نے 30 جنوری 2025 کو کھوکھر کی ضمانت قبل از گرفتاری مسترد کر دی تھی۔ سندھ ہائیکورٹ کے لاڑکانہ سرکٹ بینچ نے 20 اکتوبر 2025 کو ایف آئی آر میں نو ماہ کی تاخیر اور دیگر وجوہات کی بنیاد پر ضمانت دے دی۔

ضمانت کی منسوخی کے لیے سپریم کورٹ میں درخواست دائر کی گئی، جسے عدالت نے خارج کر دیا۔ عدالت نے قرار دیا کہ ایف آئی آر میں نو ماہ کی تاخیر اور ملزم کے کردار کی مزید انکوائری درکار ہے۔

عدالت نے فیصلے کی کاپی واپڈا کے چیئرمین کو معلومات کے لیے بھیجنے کی ہدایت کی۔ واپڈا اور متعلقہ بجلی کمپنی سے کہا گیا کہ غیر قانونی بجلی سپلائی، بجلی چوری اور نجی طور پر بجلی لینے میں ملوث افراد کے کردار کا جائزہ لیں۔