ریلوے کی آمدن 160 ارب کرنے کا ہدف، مسائل کے حل کی ڈیڈ لائن 31 دسمبر

وفاقی وزیر ریلوے حنیف عباسی نے اعلان کیا ہے کہ رواں سال پاکستان ریلوے کی آمدن 160 ارب روپے تک پہنچائی جائے گی، جبکہ ریلوے کے مسائل حل کرنے کے لیے 31 دسمبر کی ڈیڈ لائن مقرر کر دی گئی ہے۔

انہوں نے کہا کہ اس دوران چھٹیاں بند رہیں گی اور تمام افسران اور عملہ فیلڈ میں موجود ہوگا۔ وہ راولپنڈی ریلوے اسٹیشن پر عوام ایکسپریس کے 11 نئے ڈبوں کی افتتاحی تقریب میں شریک تھے، جہاں انہوں نے نئے ڈبوں کا معائنہ بھی کیا۔

عوام ایکسپریس نجکاری کے عمل میں اے اے انٹرپرائزز نے حاصل کی تھی۔ عباسی کے مطابق نجکاری کے بعد ٹرین کی تزئین و آرائش کی گئی ہے اور یہ نجی شعبے کے تعاون سے سروس شروع کر رہی ہے۔

وزیر نے بتایا کہ ریلوے کی آمدن 88 ارب روپے سے بڑھ کر 115 ارب روپے ہو گئی ہے۔ ان کے مطابق ملازمین کی تنخواہیں باقاعدہ کر دی گئی ہیں اور صفائی کا نظام بہتر بنایا جا رہا ہے۔ 60 ریلوے اسٹیشنوں پر مفت وائی فائی فراہم کیا گیا ہے۔

حنیف عباسی نے کہا کہ 15 سال سے بند ریلوے ورکشاپ لاہور بحال کر دی گئی ہے، اور انجن اور پہیوں کی مرمت کرنے والی وہ تمام پانچ ورکشاپس بھی دوبارہ چالو کر دی گئی ہیں جو 2008 سے بند تھیں۔ انہوں نے انکشاف کیا کہ 40 میں سے 20 ٹرینوں کے بریک مکمل نہیں ہیں، اور 31 دسمبر تک مسائل حل کرنے کی کوشش کی جائے گی۔

ان کے مطابق اسٹیشنوں کی نگرانی سی سی ٹی وی کیمروں سے کی جا رہی ہے اور ریلوے کے پرزوں کی چوری روکنے کے اقدامات کیے جائیں گے۔ انہوں نے کہا کہ این ایل سی ریلوے کی بھرپور مدد کر رہی ہے اور اس کے انجن واپس لینے سے ریلوے نظام شدید متاثر ہو سکتا ہے۔

وزیر ریلوے نے کہا کہ ایم ایل ون منصوبہ عالمی بینک اور ایشیائی ترقیاتی بینک کے تعاون سے مکمل کیا جائے گا، اور تھر کول منصوبے کا افتتاح وزیر اعظم کریں گے۔

انہوں نے بتایا کہ پنجاب حکومت نے لاہور اور راولپنڈی کے اسٹیشنوں کو وکٹورین انداز میں بحال کرنے کے لیے فنڈز دیے ہیں اور ریلوے کے لیے 10 ارب روپے کا پیکیج بھی دیا ہے۔ ریلوے اسپتال نجی شعبے کے حوالے کیے جا رہے ہیں جبکہ ملازمین کو مکمل مفت علاج ملے گا۔ ڈیلی پاکستان کے مطابق انہوں نے خود کو انقلابی نہیں بلکہ کارکن قرار دیا۔