آئی سی سی ون ڈے رینکنگ: شاہین آفریدی چھٹے، بابر اعظم نویں نمبر پر

آئی سی سی کی بدھ کو جاری ہونے والی تازہ ون ڈے رینکنگ میں پاکستانی کھلاڑیوں کی کارکردگی کے ملے جلے نتائج سامنے آئے ہیں۔ یہ رینکنگ انگلینڈ اور سری لنکا کے ساتھ ملک میں جاری سہ ملکی سیریز کے بعد جاری ہوئی۔

کپتان شاہین شاہ آفریدی سیریز کے چار میچوں میں آٹھ وکٹیں لے کر دو درجے ترقی کے ساتھ ون ڈے بولرز میں چھٹے نمبر پر آ گئے۔ افغانستان کے راشد خان پہلے اور جنوبی افریقا کے کیشو مہاراج دوسرے نمبر پر ہیں۔ ابرار احمد، جو سیریز میں ابھی نہیں کھیلے، ایک درجہ کمی سے تیسرے نمبر پر چلے گئے۔

دیگر پاکستانی بولرز پیچھے رہ گئے۔ حارث رؤف نو درجے گر کر 29ویں اور نسیم شاہ چھ درجے گر کر 53ویں نمبر پر آ گئے۔ پروپاکستانی کے مطابق نوجوان اسپنر عرفات منہاس انگلینڈ کے خلاف چھ وکٹوں کے بعد 15 درجے ترقی کر کے 435 پوائنٹس کے ساتھ 68ویں نمبر پر پہنچ گئے۔

بلے بازوں میں سابق کپتان بابر اعظم چار میچوں میں 118 رنز بنانے کے بعد دو درجے تنزلی سے نویں نمبر پر آ گئے۔ وہ کوئی بڑی اننگز نہ کھیل سکے۔ سلمان علی آغا ایک درجہ گر کر 13ویں نمبر پر ہیں۔ انہوں نے سری لنکا کے خلاف سنچری سے آغاز کیا تھا، مگر اگلے تین میچوں میں صرف 51 رنز بنائے۔

محمد رضوان، جنہیں ون ڈے اسکواڈ سے ڈراپ کیا گیا ہے، آٹھ درجے گر کر 42ویں اور فخر زمان دو درجے گر کر 46ویں نمبر پر آ گئے۔

سب سے بڑی چھلانگ شاداب خان کی رہی، جو انگلینڈ کے خلاف 96 گیندوں پر ناقابل شکست 113 رنز کے بعد 32 درجے بہتری سے 92ویں نمبر پر آ گئے۔ پاکستان 242 رنز کے تعاقب میں 154 پر 9 وکٹیں گنوا چکا تھا، تب شاداب اور حارث رؤف نے آخری وکٹ کے لیے ناقابل شکست 89 رنز جوڑے اور ایک وکٹ سے فتح کے ساتھ ٹیم کو فائنل میں پہنچایا۔

آل راؤنڈرز کی رینکنگ میں شاداب 17 درجے بہتری سے 50ویں نمبر پر آئے، جبکہ سلمان علی آغا 16ویں اور شاہین 19ویں نمبر پر چلے گئے۔