وزارت خزانہ کا اکتوبر میں مہنگائی 9.5 سے 10.5 فیصد رہنے کا امکان

وزارت خزانہ نے ماہانہ اکنامک اپ ڈیٹ اینڈ آؤٹ لک رپورٹ جاری کر دی ہے، جس میں اکتوبر 2026 میں مہنگائی کی شرح 9.5 سے 10.5 فیصد کے درمیان رہنے کا اندازہ لگایا گیا ہے۔ رپورٹ کے مطابق ستمبر میں مہنگائی میں کمی ہوئی۔

وزارت کا کہنا ہے کہ آنے والے مہینوں میں قیمتوں کا رجحان بڑی حد تک عالمی توانائی کی قیمتوں اور ملکی منڈیوں میں خوراک کی دستیابی پر منحصر ہوگا۔

رپورٹ میں توقع ظاہر کی گئی ہے کہ مالی سال 2026-27 میں معیشت بحالی کی راہ پر رہے گی۔ زرمبادلہ کے ذخائر، زرعی پیداوار میں بہتری اور بڑھتی ہوئی معاشی سرگرمیاں اس بحالی کو سہارا دے رہی ہیں۔

زراعت کے شعبے میں فصلوں کی بہتر پیداوار سے دیہی آمدن اور کاروباری سرگرمیاں بڑھنے کی توقع ہے۔ زرعی پیداوار بڑھنے سے فوڈ پروسیسنگ انڈسٹری اور زراعت سے منسلک شعبوں کو بھی فائدہ ہوگا۔

آؤٹ لک کے مطابق تعمیراتی سرگرمیوں میں اضافہ اور کئی بڑی صنعتوں کی پیداوار بڑھنے کا امکان ہے۔ تاہم صنعتی پیداوار میں بہتری یکساں نہیں اور مختلف شعبوں کی کارکردگی مختلف ہے۔ مشینری کی درآمدات بڑھنے سے پیداواری صلاحیت مضبوط ہونے کی توقع ہے۔

رپورٹ میں اس مالی سال کے دوران ترسیلات زر اور خدمات کی برآمدات میں اضافے کی توقع ظاہر کی گئی ہے۔ ترسیلات زر بڑھنے سے قومی آمدن اور زرمبادلہ کے ذخائر کو سہارا ملے گا، جو پہلے ہی معیشت کو سپورٹ کر رہے ہیں۔

پالیسی کے محاذ پر حکومت ٹیکس وصولی بڑھانے، اخراجات پر قابو رکھنے اور اصلاحات پر توجہ دے رہی ہے۔ ٹیکس نظام میں بہتری، توانائی کی بچت اور سرکاری اداروں کی اصلاحات سے پائیدار ترقی کو سہارا ملنے کی توقع ہے۔

رپورٹ میں بجٹ سرپلس کو معاشی استحکام کے لیے مثبت پیش رفت قرار دیا گیا ہے۔ اس میں کمزور اور کم آمدن طبقات کے لیے اقدامات جاری رکھنے پر بھی زور دیا گیا ہے، جبکہ مالی نظم و ضبط اور ساختی اصلاحات کو بحالی برقرار رکھنے کے لیے اہم کہا گیا ہے۔