لاہور کی فضا نومبر کے پہلے ہفتے بہت غیر صحت بخش سے خطرناک رہی

لاہور کی فضا نومبر کے پہلے ہفتے میں مسلسل غیر صحت بخش رہی۔ پاکستان ایئرکوالٹی انیشی ایٹو کے مطابق یکم سے 7 نومبر کے دوران شہر کا اوسط ایئر کوالٹی انڈیکس 268 رہا۔

2 نومبر کو انڈیکس 335 تک پہنچ گیا، جو ہفتے کی بلند ترین سطح تھی۔ سات میں سے پانچ دن فضا بہت غیر صحت بخش اور دو دن خطرناک درجے میں رہی۔

ہفتے بھر پی ایم 2.5 کی اوسط مقدار 215.5 مائیکروگرام فی مکعب میٹر رہی، جو عالمی ادارہ صحت کی 15 کی حد سے تقریباً 14 گنا ہے۔ رپورٹ کے مطابق اس سال پی ایم 2.5 گزشتہ سال کے اسی عرصے سے 25 فیصد زیادہ رہی اور نو سالہ ریکارڈ میں یہ لاہور کا تیسرا بدترین ہفتہ تھا۔

رپورٹ میں کہا گیا کہ رات کے کم درجہ حرارت اور ہوا کی کم رفتار نے آلودہ ذرات کو فضا میں روکے رکھا۔ جن دنوں آگ کے کم از کم 11 واقعات ہوئے ان میں اوسط اے کیو آئی 207 رہا، جبکہ دیگر دنوں میں 158۔ شہر میں روزانہ اوسطاً 54.8 آتشزدگی کے واقعات ریکارڈ ہوئے۔

جن دنوں بھارت سے آنے والی ہوائیں زیادہ اثر انداز ہوئیں ان میں لاہور کا اوسط اے کیو آئی 160 رہا، جبکہ دیگر دنوں میں 187۔ رپورٹ کے مطابق ہواؤں کے راستے کا یہ تجزیہ آلودگی کے اصل ذریعے کی تصدیق نہیں کرتا۔

اسموگ رینک کے مطابق گزشتہ سات دنوں میں لاہور میں پی ایم 2.5 کی اوسط 210.1 مائیکروگرام فی مکعب میٹر رہی، جو ایک سال کی اوسط 65.2 سے تقریباً 3.2 گنا ہے۔ 2 نومبر کو یہ 282.1 تک پہنچ گئی۔

2 نومبر کو ناسا کے سیٹلائٹس نے لاہور کے گرد 300 کلومیٹر کے اندر آگ کے 488 واقعات کی نشاندہی کی، جن میں سے 204 سو کلومیٹر کے اندر تھے۔ ان کا دھواں لاہور پہنچنے کی تصدیق نہیں ہوئی۔

گزشتہ ایک سال میں عام دنوں میں پی ایم 2.5 کی اوسط 65.2 مائیکروگرام رہی، جو عالمی ادارہ صحت کی حد سے 4.3 گنا ہے۔ نومبر اور دسمبر بدترین مہینے رہے، جب یہ 237.7 تک ریکارڈ ہوئی۔ ممکنہ وجوہات میں گاڑیاں اور دیگر مقامی ذرائع، آتشزدگی، فصلوں کی باقیات جلانا، گرد و غبار اور سرد موسم کے حالات بتائے گئے ہیں۔