الیکشن چیف کے خلاف اپوزیشن ریلی، دہلی میں سخت سکیورٹی

اتوار کو نئی دہلی میں اپوزیشن کی مجوزہ ریلی کے مقام کو ڈنڈوں اور ڈھالوں سے لیس بھارتی سکیورٹی اہلکاروں نے گھیرے میں لے لیا۔ ریلی اور مارچ کی قیادت کانگریس رہنما راہول گاندھی کر رہے ہیں، اور اپوزیشن کو لاکھوں افراد کی شرکت کی توقع ہے۔

بھارت کی بڑی اپوزیشن جماعتیں اور نوجوانوں کی قیادت والی کاکروچ جنتا پارٹی چیف الیکشن کمشنر گیانیش کمار کے استعفے کا مطالبہ کر رہی ہیں۔ یہ مطالبہ ووٹر فہرستوں کی نظرثانی سے متعلق ہے، جس کے بارے میں ناقدین کا کہنا ہے کہ اس سے وزیراعظم نریندر مودی کی جماعت کو فائدہ پہنچتا ہے۔

اپوزیشن نے وسطی دہلی سے رام لیلا میدان تک تقریباً 1.5 کلومیٹر کے مارچ کا اعلان کیا ہے۔ حکام نے ٹریفک کے رخ بدلنے سے خبردار کیا، جبکہ دہلی ٹریفک پولیس کے مطابق مقام پر بڑے اجتماع کی توقع ہے۔ خبر رساں ادارے اے این آئی کے مطابق ہنگامہ کنٹرول کرنے والی گاڑیاں اور درجنوں اہلکار مقام کے باہر موجود تھے۔

سینئر پولیس افسر روہت راجبیر نے کہا: "لوگ اس ریلی میں شرکت کے لیے آنا شروع ہو گئے ہیں...ہم نے مقام پر مناسب انتظامات یقینی بنائے ہیں، اور مارچ کے راستے پر بھی انتظامات کیے گئے ہیں جو چند گھنٹوں میں شروع ہوگا۔" (انگریزی سے ترجمہ)

اپوزیشن جماعتیں، طلبہ تنظیمیں اور کاکروچ جنتا پارٹی گزشتہ ماہ سے تقریباً روزانہ مظاہرے کر رہی ہیں۔ یہ احتجاج اس وقت شروع ہوا جب انڈین ایکسپریس نے ستمبر میں رپورٹ کیا کہ کمار کے دو نائبین نے ووٹر فہرستوں کی نظرثانی، اندراج کے طریقہ کار اور ڈیجیٹل نظام پر اندرونی طور پر تحفظات اٹھائے تھے۔

ووٹر فہرستوں میں تبدیلی کا عمل گزشتہ سال شروع ہوا اور اس میں 13 کروڑ سے زیادہ نام نکالے گئے۔ ان میں 2 کروڑ 80 لاکھ فوت شدہ، 6 کروڑ 30 لاکھ نقل مکانی کرنے والے اور 3 کروڑ ایسے افراد تھے جن کا سراغ نہ مل سکا۔

اپوزیشن جماعتوں کا الزام ہے کہ نام نکالے جانے سے مسلم اور دیگر اقلیتی ووٹرز غیر متناسب طور پر متاثر ہوتے ہیں۔ انتخابی کمیشن اور بی جے پی اس الزام کو مسترد کرتے ہیں۔ کمیشن کا کہنا ہے کہ غلطی سے نکالے گئے ووٹر دوبارہ اندراج کروا سکتے ہیں۔

بی جے پی نے مخالفین پر الزام لگایا ہے کہ وہ جائز انتخابی عمل پر غلط سوال اٹھا کر جمہوریت کو کمزور کرنے کی کوشش کر رہے ہیں۔ اگلے عام انتخابات 2029 سے پہلے نہیں ہونے۔